17 ноябрь куни Австралияда илк мусулмон партияси ташкил этилди. "Австралия мусулмонлари партияси" номини олган бу сиёсий тузилма раҳбари мамлакат сенати учун сайловда иштирок этиш ниятида экани маълум қилинган.

Айни вақтда Австралияда 500 минг нафардан ортиқ мусулмон истиқомат қилади.

Мамлакат парламентида эса 250 нафар депутат мавжуд ва улардан фақат бир киши мусулмон динига эътиқод қилади.

Янги партия асосчиси 34 ёшли Диа Муҳаммад Сиднейда яшаши ва тадбиркорлик билан шуғулланиши маълум. У ўз чиқишида бутун дунёда Париж терактидан кейин динлараро тушунмовчиликлар пайдо бўлишидан хавотирда эканини айтиб ўтган.

У Австралиядаги мусулмонларнинг талаб ва истаклари инобатга олинииши кераклигини таъкидлаб ўтган.

"Ҳозиргача тарқоқ бўлиб яшаётган жамоаларда бирлашиш имкони пайдо бўлди. Энди биз ўз талабларимизни аён этишда яхшироқ шароитларга эга бўламиз", дейди Диа Муҳаммад.

У Австралиядаги бир неча партияда мусулмонларга нисбатан айрича муносабатлар мавжудлиги янги партия тузилишига сабаб бўлганини қайд этиб ўтган.

Журналистларнинг ёзишича, Муҳаммаднинг Сенатга сайланиши эҳтимоллари жуда кам. Унинг сайловда иштирок этиши учун 500 минг имзо тўпланиши керак. Лекин Австралиядаги 500 минг мусулмоннинг 20 фоизигина сайлов ҳуқуқига эга.