"ПСЖ" жамоасининг бразилиялик ҳимоячиси Давид Луис Парижга қайтишдан қўрқаётганини билдириб ўтди.

Мен Париждаги дўстларим билан телефон орқали гаплашдим ва у ердаги аҳволни сўрадим. Париждагиларнинг барчаси хавотир ва қўрқув ичида яшамоқда. Мен ҳам Парижга қайтишдан қўрқаяпман. "ПСЖ" олдидаги бурч ва вазифаларимни бажаришим керак, лекин менга қолса бу шаҳарга қайтмайман", деган Луис.

Луисдан ташқари, "ПСЖ"нинг уругвайлик ҳужумчиси Эдинсон Кавани ҳам яшаш учун хавфли шаҳарга айланган Парижга қайтишни истамаётганини билдирганди.

Маълум қилинишича, "ПСЖ" 28 ноябрь куни ўтказиладиган навбатдаги тур ўйинида рақиб жамоа "Труа"ни ўз майдонида қабул қила олмайди. Жамоанинг бу ўйини "Лорьян" жамоаси стадионида ўтказилиши кутилмоқда.

Бироз олдинроқ, "ПСЖ"нинг аргентиналик футболчиси Хавьер Пасторенинг икки дўсти Париждаги теракт қурбонига айлангани хабар қилинганди.

Эслатиб ўтамиз, Франция пойтахти Париж шаҳрида 13 ноябрь куни оқшомида давомли терактлар содир этилди. Портлашлардан бири Франция ва Германия терма жамоалари иштирокида бўлиб ўтаётган ўртоқлик учрашуви вақтида, "Стад де Франс" стадиони дарвозаси олдида содир этилган ва бу портлаш туфайли 3 киши ҳалок бўлган.

Ўйиннинг биринчи тайми вақтида содир бўлган терактлар ҳақида маълумотлар кела бошлагач, ўйинни кузатиш учун стадионга келган Франция президенти Франсуа Олланд дарҳол эвакуация қилинишган, томошабинлар орасида ваҳима бошланмаслиги учун бу ҳақда эълон берилмаган ва ўйин давом эттирилган.

Шу куни шаҳарда содир бўлган давомли терактлар туфайли жами 129 киши ҳалок бўлган ва 352 киши жароҳатланиб, шифохонага ётқизилган.