Germanwings авиакомпанияси Кар-ле-Верне қишлоғи аҳлига 13 ноябрь куни Парижда Франция ва Германия терма жамоалари ўртасида ўтган футбол ўйинига тушиш учун чипталар совға қилган эди. BFM порталининг маълум қилишича, компаниянинг A320 самолёти айнан шу қишлоқ яқинида ҳалокатга учраган эди.

Барселонадан Дюссельдорфга келаётган самолёт 2015 йил 24 мартида қулади. Бунинг оқибатида бортдаги 150 киши ҳалок бўлди. Терговдан маълум бўлишича, ҳаво кемасини иккинчи учувчи Андреас Лубиц атайлаб тоғларга урган.

Яқин орада жойлашган Кар-ле-Верне қишлоғи аҳли самолёт қолдиқларини йиғиштиришда кўнгиллилар сифатида иштирок этишган эди. Миннатдорчилик рамзи сифатида Германия авиакомпанияси уларнинг кўпчилигига, шу жумладан, маъмурият раҳбари Франсуа Баликка Франция ва Германия ўртасидаги ўртоқлик учрашувига чипталар совға қилган эди.

Ўйинга қишлоқдан камида 100 киши келган эди. Футбол ўйини пайтида “Стад-де-Франс”га яқин жойда 3 маротаба портлаш содир этилди. Қишлоқ вакилларидан ҳеч ким зарар кўрмади.