Америкалик олимларнинг ишонтиришича, инсон миясини маймун миясидан ажратиб турувчи муҳим бир жиҳат бор. Бунда инсоннинг энг яқин қариндоши ҳисобланмиш шимпанзе мияси назарда тутилмоқда. Тадқиқот натижалари Proceedings of the National Academy of Sciences журналида чоп этилди.

Тадқиқотчилари биринчи марта шимпанзе мияси структурасининг меросийлигини Homo Sapiens мияси билан қиёслаб кўришди. Улар маймун миясидан 206, инсон миясидан 217 намуна олишди. Инсон намуналари эгизаклардан, маймунлар намуналари эса ўзаро яқин қариндош шимпанзелардан олинди.

Аниқланишича, инсон ва шимпанзе мияларининг ҳажмига генетик омил сезиларли таъсир кўрсатаркан. Шу билан бирга, шимпанзе миясининг шаклланишига меросий омиллар таъсир ўтказса, инсонларда бу нарса ташқи муҳитга кўпроқ боғликлиги маълум бўлди.
“Шу тариқа, инсон мияси атроф муҳитни сезувчанроқ бўлиб чиқди. Айнан шу хусусият инсон миясини ўзгариб бораётган муҳитга мослаштириб боради ва маданий эволюцияни тезлаштиради”, - деди тадқиқотнинг етакчи муаллифи Айда Гомес-Роблес.