Россия ФСБ (Федерал хавфсизлик хизмати 31 октябрь куни Мисрда қулаб тушган A321 лайнери ҳалокати теракт амалга оширилиши туфайли содир бўлгани ҳақидаги маълумотни тасдиқлади. Бу ҳақда РИА Новости нашри ФСБ раҳбари Александр Бортниковга асосланган ҳолда хабар тарқатган.

Хабарда айтилишича Александр Бортников Путин иштирокидаги мажлисда шундай маълумотни айтган.

"Владимир Владимирович, Мисрда қулаган А321 самолётидаги юклар, шахсий буюмлар ва самолёт қолдиқлари текшириб чиқилди. Экспертиза хулосаларига кўра, самолёт бўлакларида хорижда ишлаб чиқилган портловчи модда излари мавжуд", дейди ФСБ раҳбари.

"Бир сўз билан айтганда, самолёт теракт туфайли қулаган", дея қайд этади у.

У самолёт бортида тротил эквивалентида 1 килограммга тенг портловчи қурилма ишга тушганини тасдиқлаган. Унинг айтишича бу қурилма қўлбола бомба ҳисобланади.

Эслатиб ўтамиз, "Когалмавиа" компаниясига тегишли Airbus A321 лайнери 31 октябрь куни Мисрнинг Синай ярим ороли ҳудудида қулаган эди. Самолёт Шарм-аш-Шайхдан Санкт-Петербургга учаётган, унинг бортида 217 нафар йўловчи ва 7 нафар экипаж аъзоси бўлган. Улардан ҳеч бири омон қолмаган.