Россия бош вазири Дмитрий Медведев Осиё ва Тинч океани минтақаси давлатлари саммитидаги чиқишида барчани террорга қарши бирлашишга чақирди. Бу ҳақда Интерфакс агентлиги хабар бермоқда.

“Бизнинг самолётимизга қарши уюштирилган теракт ва Париждаги террорчилик ҳужуми улкан инсоний йўқотишдир. Бу воқеалар халқаро сиёсий кун тартибини кескинлаштирди. Уруш бутун маданиятли дунёга эълон қилинди, таҳдид глобал ва, афсуски, мутлақо реалдир”, - деди у.

У “Россия билан ишлашни истамайдиган” айрим давлатларни койиди: “Биз русларга бойкот эълон қилдик, улар билан дўст бўлмаймиз, уларни изоляция қиламиз. Шунга ўхшаш”.
Унинг таъкидлашича, “Россия бу алоқаларсиз ҳам яшай олади”, “ёлғизликда террорга қарши тура” ва “бу жангда ғалаба қозона олади”. “Ғарб ҳам туриб бера олади, лекин масала – қандай йўқотишлар эвазига”.
“Менинг ишонишимча, биз бирга бўлишимиз лозим”, - хулоса қилди сиёсатчи.