Parij shahri shimolidagi Sen-Deni tumanida huquq-tartibot organlari xodimlari tomonidan o‘tkazilgan aksilterror amaliyot chog‘ida otishma yuz berishi natijasida kamida 1 kishi halok bo‘lgan. Bu haqda Liberation nashri xabar tarqatdi.
"Ma'lum qilinishicha, Parij shimolida o‘tkazilgan aksilterror amaliyoti vaqtida kamida 1 kishi halok bo‘lgan", deb yoziladi nashrda.
Halok bo‘lgan shaxsning kimligiga aniqlik kiritilmagan, u politsiyachi, tinch aholi vakili yoki terrorchi bo‘lishi ham mumkin.
Biroz oldinroq, terrorchi yashiringani taxmin qilingan hudud o‘rab olingani xabar qilingandi.
Bu hududda Parij teraktiga aloqadorligi taxmin qilingan 2 kishi yashiringani aytilgan.
Eslatib o‘tamiz, 13 noyabr oqshomida Parijda sodir etilgan davomli teraktlar tufayli 129 kishi halok bo‘lgan, 352 kishi jarohatlangan. Shifoxonadagilarning 99 nafari og‘ir ahvolda qolmoqda.