Россия Қуролли кучлари бош штаби бошлиғи Валерий Герасимов Россия Сурияда жангариларга қарши қанотли ракеталар қўллагани ва бу ҳақда коалиция давлатларини олдиндан огоҳлантириб қўйганини айтди. Бу ҳақда Герасимов Россия президенти Владимир Путин билан йиғилиш пайтида маълум қилди. Йиғилиш “Россия 24” телеканали орқали намойиш қилинди.

“Бугун биринчи катта кўламдаги авиация зарбалари доирасида узоқ масофага учувчи 34 та қанотли ракета билан террорчиларнинг 14 та муҳим объекти – Идлиб ва Ҳалаб вилоятларида ИШИД жангарилари отрядлари ҳаракатларини мувофиқлаштиришни амалга оширувчи ноқонуний қуролланган тузилмаларни бошқариш пунктлари, йирик ўқ-дори ва бошқа моддий воситалар омборлари йўқ қилинди”, деб айтди Герасимов.

“Жангарилар объектларига зарбалар берилиши режа бўйича давом этмоқда”, деб қўшимча қилди Герасимов.

Аввалроқ ОАВларда Россия ўзининг Ўрта Ер денгизидаги кемаларидан Раккадаги нишонларга қанотли ракеталар учиргани маълум қилинганди. Шунингдек, Россия сув ости кемаларидан ИШИДга қарши “Калибр” русумидаги қанотли ракеталар билан зарба берилгани ҳам маълум қилинганди.