Туркия ўзининг ракетага қарши мудофаа тизими миллий лойиҳасини ишлаб чиқишга қарор қилгани сабабли қиймати 3,4 млрд долларлик ракетага қарши мудофаа (РҚМ) тизими учун бутловчи қисмлар ишлаб чиқаришга тендерни бекор қилганини тасдиқлади. Бу ҳақда Туркия Мудофаа вазирлигининг 17 ноябрдаги ёзма баёнотида айтилди.   

РҚМ тизими учун бутловчи қисмлар харид қилиш бўйича 4 млрд долларлик тендер 2009 йилда эълон қилинган эди. 2013 йил сентябрда 3,4 млрд доллар таклиф қилган Хитойнинг CPMIEC компанияси тендерда ғолиб бўлган. Хитой компаниясидан ташқари тендерда АҚШнинг Raytheon & Lockheed Martin консорциуми, Eurosam француз-итальян концерни ва Россиянинг “Рособоронэкспорт” компаниялари вакиллари иштирок этишган.

Хитой компанияси тендер бўйича рақобатчиларидан фарқли, ракета мажмуаларининг бир қисмини Туркияда ишлаб чиқариш ва бу технологияларни Туркияга бериш имкониятига йўл қўйган, бироқ томонлар Туркиянинг бу лойиҳадаги иштироки даражаси бўйича якуний келишувга кела олмадилар. Бундан ташқари, Хитой компаниясининг тендер ғолиби бўлиши Туркияга унинг НАТО бўйича иттифоқчилари томонидан босим ўтказилишини келтириб чиқарди.