Онадўли университети талабаси Мустафа Ўзсари Грецияга қарши ўйин арафасида мухлислар нега ҳуштакбозлик қилишгани ҳақида гапириб берди.

Унинг айтишича, бу ҳуштакбозлик Париждаги теракт қурбонлари хотирасига ҳурматсизлик белгиси эмас, 1 дақиқалик сукут сақлаш вақтида мухлислар террорчиларни қоралаб сўзлар айтишган.

"Туркиядаги футбол ўйинлари арафасида теракт қурбонлари хотираси учун сукут сақланиш вақтида йигитлар баъзи ҳайқириқларни айтишади: "Шаҳидлар ўлмайди. Еримиз бўлинмайди".

Бундай одат КИП (Курдистон ишчилар партияси - кун.уз изоҳи) томонидан содир этилган терактлар туфайли пайдо бўлган. Бу ташкилот хуружлари туфайли шу вақтгача Туркиянинг 30 мингдан ортиқ фуқароси ҳалок бўлган. Энди биз ҳар сафар террорчилар кимнидир ўлдиришса, шундай ҳайқириқлар айтамиз.

Мухлислар Париж теракти қурбонларига эмас, террорчиларга нисбатан ҳуштакбозлик қилишди. Турклар дунёдаги ҳар қандай терактни қоралайди. Терактлар қурбонларининг яқинлари дардига биз ҳам шерикмиз. Биз ҳеч қачон теракт қурбонлари хотирасига ҳурматсизлик қилмаймиз", дейди Ўзсари.

Бундан олдинроқ, туркиялик мухлислар Грецияга қарши ўйин арафасида 1 дақиқалик сукут ўрнига ҳуштакбозлик қилишгани ҳақида хабар берилганди.

Эслатиб ўтамиз, 13 ноябрь оқшомида Парижда содир этилган давомли терактлар туфайли 129 киши ҳалок бўлган, 352 киши жароҳатланган. Шифохонадагиларнинг 99 нафари оғир аҳволда қолмоқда.