Тош қуроллар, жониворлар суяклари, ўсимликлар қолдиқлари археологларга Жанубий Америкада илк одамлар 15 минг йил муқаддам пайдо бўлганини аниқлашга ёрдам берди. Қазилма ишлари Чили жанубидаги Монте-Верде манзилгоҳида ўтказилди.

Тадқиқот натижалари PLoS ONE журналида эълон қилинди.
40 йил муқаддам фандаги ўрнашиб қолган фикрга кўра, Жанубий Америкага илк одамлар 13 минг йил олдин Осиёдан келган. Уларнинг бу ҳудудга кўчиб келиши Кловис археологик маданияти билан боғланар эди. Янги қазилмалар бу санани янада чуқурлаштириш имконини берди.

Бу манзилгоҳда қуроллар Кловисдагига нисбатан бошқачароқ ишлангани аниқланди.
“Катта кашфиётлардан бири шундаки, топилмаларнинг каттагина қисми, 34 фоиз атрофида, маҳаллий бўлмаган материаллардан ясалгандир”, - деди тадқиқот раҳбари Том Диллехай.
Айтилишича, уларнинг кўпи қирғоқдан, бир қисми эса ҳатто Анд тоғлари ортидан олиб келинган.