АҚШ Федерал қидирув бюроси директори Жеймс Коми Нью-Йоркда ўтган киберхавфсизлик бўйича конференциядаги чиқиши чоғида ИШИД жангарилари томонидан қўлланадиган кодлаш методлари идора мутахассисларини боши берк кўчага киритиб қўйганини тан олди.

Унинг сўзларига қараганда, бюро ижтимоий тармоқларда ёлловчиларнинг бўлажак террорчилар билан ёзишмаларини кузатиб боради, суд ордерига эга бўлганида эса террорчиларга хайрихоҳлик билдираётган фойдаланувчиларнинг электрон почта қутиларини текширади. Аммо биров камикадзе бўлиш ниятини билдириши билан террорчилар кодланган платформаларга ўтиб кетади.

The Wall Street Journal нашрининг ёзишича, Париждаги терактлар хавфсизлик борасидаги миллий қонунчиликка жиддий ўзгартишлар киритилишига замин ҳозирлаши мумкин. Эндиликда миллий хавфсизлик фуқароларнинг ёзишмаларини сир сақлаш ҳуқуқидан устун қўйилиши мумкин. Конференцияда айнан шу ҳақда гап кетди.