Франция бош вазир Мануэль Вальснинг маълум қилишича, мамлакатдаги фавқулодда ҳолат режими яна 3 ой муддатга узайтирилди.

Фавқулодда ҳолат режими Париж терактларидан кейин жорий қилинганди.

15 ноябрь куни Франция президенти Франсуа Олланд фавқулодда режим ҳолати муҳлатини 12 кундан 3 ойга узайтириш таклифи билан чиққанди.

Эслатиб ўтамиз, 14 ноябрга ўтар кечаси Франция пойтахти Париж шаҳрида ИШИД жангарилари томонидан давомли терактлар содир этилди. Охирги маълумотларга кўра, ушбу хунрезликлар натижасида 129 киши ҳалок бўлган, жароҳатланганлар сони 352 нафарни ташкил этади. Жароҳатланиб шифохонага ётқизилганларнинг 99 нафари оғир аҳволда қолмоқда.

Ушбу терактлар 8 нафар жангари томонидан амалга оширилган, уларнинг 7 нафари шаҳидлик белбоғини таққан ҳолатда бўлган.