Қозоғистон президенти Нурсултон Назарбоев “Қозоғистон Республикасида давлат хизмати тўғрисидаги” қонунга тақиқлов қўйди, деб хабар бермоқда “Новости-Казахстан” ахборот агентлиги.  

“Бугун мен давлат хизмати тўғрисидаги қонунга тақиқлов қўйдим ва уни парламентга кўриб чиқиш учун қайтараман ва менинг ўзгартиришларимни кўриб чиқишни сўрайман. Давлат хизматчиларининг пенсия ёшига етиши билан пенсияга чиқишлари бўйича аниқ позицияни белгилаш керак. Етар, ҳаммани 25 йил ушлаб турдик, кетиш кераклигини айтдик. Барчанинг пенсияга кетиши бўйича аниқ муддат бор. Совет пайтида 2-3 йилда қўйиб юборишса, ҳамма хурсанд бўлиб кетарди. Ҳозир эса ҳеч ким кетишни истамайди”, деб айтди Нурсултон Назарбоев ҳукуматнинг кенгайтирилган йиғилишида.   

“Пенсияга кетиш бўйича аниқ муддат бор ва Қозоғистонда қанча одам пенсиядан кейин ишлаётганини биламан. Бу сиёсий давлат хизматчиларига ҳам тегишли бўлиши керак. Ягона истисно шу бўлиши мумкинки, биз қонунда президент томонидан тайинланадиган сиёсий хизматчилар лавозимлари учун президент ўз истагига кўра пенсияга чиқиш муддатини 1 йилдан 5 йилгача узайтириши мумкинлигини кўзда тутишни сўрамоқдамиз. Балки узайтирмаслиги ҳам мумкин”, деб қўшимча қилди Назарбоев.

“Қозоғистон Республикасида давлат хизмати тўғрисидаги” қонун 22 октябрда парламент томонидан қабул қилинди. Қонуннинг асосий мақсади давлат хизматига ишга кириш, уни ўтиш ва тугатиш бўйича ижтимоий алоқаларни тартибга солишдан иборат. Қонун давлат хизмати тамойиллари, Қозоғистон давлат хизматчиларининг ҳуқуқий ҳолати ва мавқеи, давлат хизматига кириш шартлари ва уни ўтиш тартибини белгилайди.