13 ноябрь куни Парижда теракт содир этганлардан бири, Вольтер хиёбонида ўзини портлатган Иброҳим Абдисломнинг собиқ рафиқаси, 36 ёшли Наиманинг айтишича, унинг собиқ эри диндор одам бўлмаган.

Наиманинг айтишича, Иброҳим доимий равишда гиёҳванд моддалар қабул қилган, муқаддам судланган.

“У электрик дипломига эга бўлса-да, касби бўйича бир кун ҳам ишламаган. Собиқ эрим дангаса эди, кун бўйи ухларди. У қабул қилаётган наркотиклар миқдори кўплигидан доим хавотирда бўлардим”, дейди Наима The Mirror нашрига.

Маълум бўлишича, улар 2006 йилда танишиб, турмуш қуришган. Икки йилга яқин бирга яшаб, сўнг ажрашишган. Аёлнинг айтишича, у собиқ эри террорчига айланганини билмаган.

“Мен у ҳақида ўша вақт у диндор бўлмаганини айта оламан. Ота-онаси Рамазон ойида уни рўза тутишга мажбурлашар эди”, деди у.

Эслатиб ўтамиз, 13 ноябрь оқшомида Париж шаҳрида ИШИД аъзолари томонидан уюштирилган давомли терактлар натижасида, порлашлар ва отишмалар туфайли 129 киши ҳалок бўлган.