Россия Бош штабининг бош тезкор бошқармаси бошлиғи генерал-полковник Андрей Картаполовнинг маълум қилишича, Россия авиацияси Суриядаги Ракка, Дайр аз Заур, Ҳалаб ва Идлиб вилоятларидаги ИШИД террорчилик ташкилоти марраларига иккинчи оммавий зарбалар уюштирди. Бу ҳақида РИА “Новости” хабар бермоқда.

Унинг сўзларига кўра, Москва вақти билан 5.00 дан 5.50 га қадар Ту-22М3 бомбардимончи самолёти Ракка ва Дайр аз Заур вилоятларидаги ИШИД объектларига авиазарба берган. Авиазарбалар террорчиларнинг қурол-аслаҳа ва ўқ-дорилар сақланадиган омборхоналари, техникалари, жангариларни тайёрлаш лагерлари, шунингдек, портловчи қурилмалар тайёрлайдиган устахоналарига берилган.

“Москва вақти билан 9.00 дан 9.10 га қадар Россия ҳудудидан Ҳалаб ва Идлиб вилоятларидаги ИШИД объектларига Ту-160 ракета ташувчисидан 12 та қанотли ракета учирилди”, — деб қўшимча қилди генерал. Натижада жангариларнинг учта қўмондонлик пункти, иккита қурол-яроғ ва ўқ-дори сақланадиган омбори, дала қароргоҳлари йўқ қилинган.

Шундан сўнг, Картаполовнинг маълум қилишича, айнан шу вилоятлардаги террорчиларнинг олти маррасига Ту-22М3 бомбардимончиси авиазарбалар уюштирган.