Россия ташқи ишлар вазири ўринбосари Михаил Богдановнинг айтишича, Сурия ташқи ишлар вазири Волид Муаллим кейинги ҳафтада Россияга ташриф буюради ва ўзининг россиялик ҳамкасби Сергей Лавров билан террорчилик билан курашиш ва Суриядаги сиёсий жараённи муҳокама қилади. Бу ҳақда РИА “Новости” ахборот агентлиги маълум қилди.

“Ҳозир биз Сурия томонидан тасдиқни кутмоқдамиз, кейинги ҳафтада икки вазир ўртасида сермаҳсул ва мулоҳазали маслаҳатлар бўлади, деб умид қиламиз”, деб айтди Богданов.

Богдановнинг айтишича, учрашув давомида Россия ва Суриянинг умумий ишидаги икки асосий йўналиш – террорчиликка қарши кураш ва 2012 йил 30 июндаги Женева коммюникеси ва Вена келишувлари бўйича сиёсий жараённи илгари суриш натижалари ва истиқболлари муҳокама қилинади.

Эслатиб ўтамиз, 2015 йил октябрда Сурия президенти Башар Асад Россияга ишчи ташриф билан келган эди.