BMW компанияси янги ихчам седаннинг концептуал намунасини расман тақдим этди. World Car Fans нашрининг таъкидлашича, янги машина 1-Series оиласининг янги вакили қанақа бўлиши ҳақида тасаввур ҳосил қилади. Прототип Гуанчжоудаги автосалонда намойиш этилди.

Прототипнинг габарити ҳақида ҳам, куч қурилмаси ҳақида ҳам маълумот келтирилмади. Фақатгина у 20 дюймли ғилдирак дисклари ва ҳам олдиндан, ҳам орқадан ёруғлик диодли оптика билан таъминлангани аниқлаштирилди.
1-Series’нинг амалдаги авлодидан 5 эшикли хэтчбекнинг габарит узунлиги 4 329 мм ни, кенглиги 1 765 мм ни, баландлиги эса 1 440 мм ни ташкил қилади. Унинг ғилдирак базаси 2 690 мм га тенг.

Concept Compact Sedan интерьерида лакланмаган ёғоч, тери ва алюминийдан фойдаланилди. Прототип проекцион дисплей, 8.8 дюймли мультимедиа тизими экрани ҳамда иккинчи қатордаги икки алоҳида ўриндиқ, панорама томи, сенсорли эшик дасталари ва ойна кўтаргичлар билан таъминланди.
Ихчам седан синовлари 2014 йили бошланган эди. Ўша йилнинг сентябрида тармоққа прототипнинг суратлари жойлаштирилган эди. Модель 2017 йилдан конвейерга қўйилиши мумкинлиги айтилмоқда.