Carlson Rezidor номли меҳмонхоналар тармоғининг Малидаги вакилининг маълумотига кўра, бугун жангарилар томонидан гаровга олинган меҳмонхонада 125 нафар меҳмон ва 13 нафар хизматчи асирликда қолмоқда.

"Олинган охирги маълумотларга кўра, айни вақтда жами 138 киши асирликда бўлиб турибди. Улардан 125 нафари мижозлар, 13 нафари меҳмонхона хизматчилари", дейилади хабарда.

Эслатиб ўтамиз, бугун эрталаб Мали пойтахти Бамако шаҳридаги Radisson Hotel Bamako меҳмонхонасига ўнлаб жангарилар бостириб кирди ва 170 кишини асирга олди. Босқиндан олдин юз берган портлаш ва отишма вақтида 3 киши ҳалок бўлган. Улардан бири франциялик, 2 нафари эса малилик.

Меҳмонхона атрофи 200 нафарга яқин ҳарбий томонидан ўраб олинган.

Хабар қилинишича, бу меҳмонхона Air France авиакомпанияси ходимлари ҳамда мижозлари томонидан доимий равишда фойдаланиладиган меҳмонхона ҳисобланади.

Бироз олдинроқ, меҳмонхонада 80 нафар асир чиқариб олингани ҳақида хабар берилганди.

Асирликда қолаётганлар орасида туркларнинг Turkish Airlines авиакомпанияси ходимлари, 20 нафарга яқин ҳиндистонлик, ўнлаб хитойликлар ҳамда Франция фуқаролари борлиги айтилган.