Голландияда ҳам Париж терактларининг асосий ташкилотчиларидан бири бўлгани гумон қилинаётган Салоҳ Аблисломни қидириш ишлари бошланди. Бу ҳақда қидирув ишларидаги манбасига асосланган ҳолда CNN хабар тарқатган.

Бироз олдинроқ, Франция бош вазири Мануэль Вальс ушбу шахснинг қайси давлатда экани ҳақида маълумотга эга эмаслигини билдирганди.

Шу вақтгача Салоҳ Абдисломни Франция ва Бельгияда қидиришаётганди.

Франция полицияси хориж мамлакатларига ушбу террорчи ҳақидаги маълумотларни ва суратларни жўнатган. Унга тегишли бўлгани тахмин қилинган автомобил белгилари ҳам тарқатилган.

18 ноябрь куни Парижнинг Сен-Дени туманида ўтказилган махсус амалиёт давомида теракт ташкилотчиларидан бири Абдулҳамид Абауд ўлдирилди ва янги терактларга тайёрланган гуруҳ қўлга олинди.

Эслатиб ўтамиз, 13 ноябрь оқшомида Париж шаҳрида давомли терактлар содир этилди ва бу терактлар оқибатида 129 киши ҳалок бўлиб, 352 киши жароҳатланди. Шифохонадагиларнинг 99 нафари оғир аҳволда қолмоқда.