Дунёдаги спорт кийимлари ишлаб чиқарувчи энг йирик Nike компанияси директорлар кенгаши 12 млрд долларлик ўз акцияларини қайтариб сотиб олиш ҳамда А ва В синфидаги акцияларни бўлиш бўйича янги дастурни маъқуллаганини эълон қилди.

Айни пайтда компанияда 8 млрд долларлик акцияларни қайтариб сотиб олиш бўйича дастур амал қилмоқда. Янги 4 йиллик дастур жорий дастурдан кейин бошланади. Жорий дастур 2016 йилнинг май ойи охирида якунланади.

Nike акцияларининг бўлиниши 23 декабрдаги акциялар кўринишида дивидендларни тўлаш орқали амалга оширилади.

1964 йилда Фил Найт ва Билл Бауэрман томонидан яратилган компания ҳозирда ўзининг бош рақобатчиси Adidas’ни ортда қолдирмоқда ҳамда кичикроқ рақобатчиларидан анча олдинда бормоқда.

Октябрда компания яқин беш йилда ўтган даврга нисбатан тезроқ ўсишни кутаётганини айтган. Nike 2020 молиявий йилда ўзининг тушумини электрон тижорат, аёллар учун маҳсулотлар ва Jordan бренди буюмларини сотиш ҳисобига 63 фоизга, яъни 50 млрд долларгача кўпайтиришни режалаштирмоқда.