АҚШ президенти Барак Обама сочини бўяйдиган дунё давлатлари етакчилари исмини айтмади. Reuters ахборот агентлигининг маълум қилишича, Обама Куала-Лумпурда талабалар билан учрашуви пайтида у “анча ёшга бориб қолгани” сабабли ундан “доно маслаҳат” беришни сўрашди.

“Мен ёшлардан истайдиган биринчи нарсам, мени қари деб аташни бас қилишсин. Ахир, сиз нафсониятимга тегяпсиз”, деб ҳазиломуз жавоб берди Обама камбожалик талабанинг саволига. Обаманинг айтишича, у ҳокимият тепасига келганда унда оқ соч бўлмаган, ҳозир эса унинг сочига оқ тушиб кетган. “Мен сочимни бўямайман, бироқ менинг кўплаб ҳамкасбларим сочларини бўяйдилар. Мен уларнинг кимлигини айтмайман. Бироқ уларнинг сартарошлари билишади”, деб қўшимча қилди Обама.

Reuters ахборот агентлигининг эслатишича, АҚШнинг собиқ президенти Рональд Рейган сочларини бўяши ҳақидаги миш-мишларни инкор қилиб келган ва унинг сартароши ҳам бунинг аксини айтмаган. Германиянинг собиқ канцлери Герхард Шредер унинг сочини бўяши ҳақида маълумот берган немис янгиликлар агентлиги устидан судга шикоят аризаси берган. Хитойлик етакчиларнинг ёшидан қатъи назар сочлари “жуда шубҳали” қора рангда кўринади, деб қўшимча қилмоқда агентлик.