Сен-Денидаги аксилтеррор амалиёти вақтида яна бир террорчи йўқ қилингани маълум бўлди

Жаҳон 20 Ноябрь 2015 1099

Франция прокуратурасининг маълум қилишича, 18 ноябрь куни Париж шаҳри шимолидаги Сен-Дени туманида ўрнашиб олган террорчилар гуруҳига қарши ўтказилган аксилтеррор вақтида 2 нафар эмас 3 нафар жангари йўқ қилинган.

Улардан бири, гуруҳ бошлиғи, 13 ноябрь кунги терактлар ташкилотчиси ҳамда гуруҳнинг қолган аъзолари билан янги теракт содир этишга тайёрланган Абдулҳамид Абауд, иккинчиси ўзини портлатган Ҳасна Аитбулахан (Абдулҳамиднинг амакиваччаси) экани маълум бўлганди. Амалиёт якунида 7 нафар киши террорчиликда гумон қилиниб, қўлга олинганди. 

Амалиёт вақтида 5 нафар полициячи жароҳатланган, бир нафар тинч аҳоли вакили ўққа учраб ҳалок бўлган.

BBC News хабарига кўра, қамал қилинган ҳудуддан яна бир кишининг жасади топилган. Унинг шахси аниқланмаган, лекин аёл жинсига мансублиги маълум.

13 ноябрь куни оқшомида террорчилар Парижда 7та нуқтада ўз мақсадларини амалга оширишди. Аввалига "Стад де Франс" стадиони яқинида портлаш, кейин Сена дарёси бўйидаги кафеларда ўт очилиши, ниҳоят "Батаклан" театрида одамларнинг қирғин қилиниши оқибатида 129 киши ҳалок бўлганди.

Бугун жароҳатланиб, шифохонага ётқизилган 352 кишидан бири оламдан ўтди.

Францияда ўша куниёқ фавқулодда режим ҳолати ўрнатилган, 19 ноябрь куни бу режим муҳлати 3 ойга узайтирилган.

Терактнинг яна бир ташкилотчиси сифатида гумон қилинаётган Салоҳ Абдислом эса бир қатор мамлакатлар бўйлаб қидирилмоқда.

Кўпроқ янгиликлар