22 ноябрга ўтар кечаси АҚШнинг Невада штати Лас-Вегас шаҳрида профессионал бокс оқшоми ташкил этилади. Mandalay Bay аренасида ўтказилувчи бокс оқшомининг марказий жанги ўрта вазн тоифасида бўлиб ўтади.

Унда бир нечта вазн тоифасида собиқ жаҳон чемпиони, куни кеча WBC қарорига кўра ушбу йўналиш чемпионлик камаридан маҳрум қилинган пуэрто-риколик 35 ёшли Мигель Котто биринчи ўрта вазн тоифасида собиқ жаҳон чемпиони мексикалик 25 ёшли Сауль “Канело” Альваресга қарши рингга кўтарилади.

Boxing News24 нашри хабарига кўра Котто бу жанг учун 15 млн доллар, Альварес эса 5 млн доллар олиши кафолатланган. Бу гонарарлар миқдори жанг телетрансляциясидан тушган фойда эвазига ортиши мумкин.

Котто WBC камарига ўтган йилнинг июнида аргентиналик Серхио Габриэл Мартинесни мағлуб этиш орқали эришганди. Шу йилнинг июнида у австриялик Дэниэл Гилга қарши ҳимоя жангини ўтказиб, 4-раундда нокаут эвазига ғалаба қилган.
Маълумот учун, 35 ёшли боксчи Коттонинг ҳисобида 40та ғалаба (33та нокаут), 4та мағлубият мавжуд.
25 ёшли Альварес эса 45та ғалабали (32 нокаут), битта мағлубиятли жанг ўтказган.