Суриядаги ихтилофдан кўрилган иқтисодий зиён “юз миллиардлаб” долларга баҳоланмоқда. Бундай баҳони Сурия президенти Башар Асад “Феникс-ТВ” Гонконг телеканали орқали кўрсатилган интервьюсида келтириб ўтди.

Асаднинг маълумотларига кўра, ихтилоф оқибатида 10 фоиз мактаблар, 30 фоиз шифохоналар вайрон бўлган. Инфратузилма, энергетика объектлари жиддий зарар кўрган. “Бу исталган урушнинг оқибатидир ва бу жуда даҳшатли”, деб айтди Асад.

Асад, шунингдек, террорчилар томонидан тарихий-маданий ёдгорликларнинг йўқ қилиниши юзасидан афсусдалигини айтди. “Таланган объектлардан кўпчилиги ноқонуний йўл билан мамлакат ташқарисига олиб чиқиб кетилган бўлиши мумкин. Биз дўстона давлатлар ва ЮНЕСКО каби халқаро ташкилотлар билан бу ёдгорликларни топиб, ортга қайтариш бўйича иш олиб борамиз”, деб қўшимча қилди Асад.