Ироқ ва Ливияда содир этилган жиддий хатоларга Сурия ихтилофида йўл қўймаслик керак. Бу ҳақда Испания ташқи ишлар ва ҳамкорлик вазири Хосе Мануэль Гарсиа-Маргальо баёнот берди.

Унинг таъкидлашича, “араб баҳори” чоғида дарҳақиқат жиддий хатоларга йўл қўйилган эди.

“Кеча нима қилганимиз ҳақида эмас, эртага нима қилишимиз ҳақида ўйлашимиз лозим”, - деди у Rason газетасига берган интервьюсида.

Мисол тариқасида Маргальо Ливиядаги вазиятни келтирди. У ерда Муаммар Каддафининг ағдарилиши шундай вазиятга олиб келдики, натижада “давлатда давлатчилик йўқ”.
“Ироқда ҳам Саддам Ҳусайн билан боғлиқ ҳамма нарсани йўқ қилишга қарор қилиниши жиддий хато бўлган эди”, - таъкидлади дипломат. Унинг фикрича, Ироқдаги давлат структураларининг йўққа чиқиши ҳамда сиёсий бўшлиқ шу сабабдан келиб чиққан эди.