АҚШнинг National Interest журналида таъкидланишича, ҳар қандай уруш битта учқундан бошланади. Айнан мана шундай учқун чиқиши мумкин бўлган ўчоқлар ҳозир дунёда бешта бўлиб, уларга жаҳон ҳамжамияти жиддий эътибор қаратиши лозим.
Биринчи навбатда бу Сурия ихтилофидир.
“ИШИДнинг кучайиши Франция, Россия, АҚШ ва бошқа давлатларни безовта қилмоқда. Аммо коалиция ҳам етарлича натижа қила олмаяпти. Ўз навбатида, Сурияда ташқи кучлар ўртасида урушнинг авж олиши бу ўчоққа Туркия, Ироқ ва Саудия Арабистонини тортиб кетиши мумкин, бу эса, ўз навбатида, дунёнинг бошқа қисмларига тарқалиши мумкин”, - дейилади мақолада.
Бундай ўчоқлардан яна бири, колумнистнинг фикрича, Ҳиндистон ва Покистон ўртасидаги ихтилофдир. Узоқ йиллардан бери охири кўринмайдиган уруш пировардида кенгайиб кетиши мумкин, негаки Покистонда ядровий қурол бор, ўз навбатида, Ҳиндистон ҳам АҚШ билан яқинлашмоқда.
Учинчи ўринга нашр Шарқий Хитой денгизидаги вазиятни қўйди. Мана икки йилдирки у ерда ХХР ва Япония Сенкаку архипелаги атрофида “хатарли” ўйин ўйнамоқда. Бу оролларга даъво қилаётган ҳар икки давлат унинг атрофида ўз қуролли кучларини жойлаштирди. Улар очиқ қаршиликка ўтишса, Япониянинг иттифоқчи АҚШ четда қола олмайди.
Шу билан бирга, Жанубий Хитой денгизидаги вазият янада мураккаброқдир. Бу ерда Хитой билан ҳудуд талашаётган кўплаб майда ва ўрта давлатлар яна ўша АҚШ ҳимоясидадир. Томонлардан бири ўзини тута олмай қолиши эҳтимолдан узоқ эмас, негаки бир томондан ХХР бу ерда сунъий ороллар яратмоқда, бошқа томондан эса, АҚШ ўз денгиз кучлари ёрдамида бу ердаги вазиятни назоратга олишга интилмоқда.
Ниҳоят, охирги пункт Украинадаги вазият билан боғлиқдир. Агар Россия бу ердаги ҳаракатларини жадаллаштирса, НАТО аралашиши мумкин.