Германия ташқи ишлар вазири Франк-Вальтер Штайнмайер Bild газетасига берган интервьюсида Россиянинг “катта саккизликка” (G8) қайтиши шартларини маълум қилди.  

Унинг айтишича, агар Россия ва Ғарб Украина инқирозидаги тўсиқларни енга олса ва томонлар Сурия масаласи бўйича ечимларни излашда муваффақиятли ишласа, унда ғарб давлатларида Россияни узоқ муддатга халқаро муҳокамадан истисно қилиш учун ҳожат бўлмайди.   

Штайнмайернинг айтишича, Ғарбга Россияни яккалаш ва G8’ни G7’га айлантириш варианти ҳеч қачон хуш келмаган.

Октябрда Владимир Путин маъмурияти бошлиғи Сергей Иванов Россия G8’да иштирок этмаётганидан ҳеч ҳам хафа эмаслигини, “охирги санкцияларнинг Россия иқтисодиётида таъсири эса Ғарб давлатлари томонидан жуда бўрттириб юборилганини” айтган эди. Бу орада собиқ молия вазири Алексей Кудрин санкциялар оқибатида Россия ялпи ички маҳсулоти 1,5 фоизга камайганини айтиб ўтди.