АҚШнинг Ford автомобилсозлик корпорацияси АҚШ, Канада ва Мексикада Fusion ва Mercury Milan моделидаги 452 мингта автомобилни ёнилғининг оқиб кетишига олиб келиши мумкин бўлган носозлик сабабли ортга қайтариб олмоқда. Бу ҳақда АҚШ компаниясининг расмий вакиллари маълум қилдилар.

2008 йилдан 2011 йилгача ишлаб чиқарилган Fusion ва Mercury Milan моделидаги машиналар қайтариб олинмоқда. Ford техник мутахассисларининг маълумотларига кўра, бу машиналарнинг ёнилғи тизимидаги клапанларидан бири носоз бўлиши мумкин. Шу сабабли ёнилғи бакида босимнинг хавфли алмашиши хавфи бор бўлиб, у ёнилғи оқиши ва алангаланишга олиб келиши мумкин.    

Ford’нинг таъкидлашича, ҳозирча ушбу носозлик билан боғлиқ бирорта йўл-транспорт ҳодисаси қайд этилмаган.

Қайтариб олинадиган машиналардан 411 мингтага яқини АҚШда, 24 мингтаси Канада ва 7 мингтаси Мексикада жойлашган.

Бундан ташқари, Ford Огайо штатидаги заводида 2015 йилнинг 29 июнидан 3 сентябригача йиғилган 13 та F-650 юк машинасини чақиртириб олмоқда. Маълумотларга кўра, ушбу машиналарнинг бошқарув тизимида нуқсонлар бўлиши мумкин.