Утрехт университетидаги шифохона Нидерландия учун рекорд бўлган 350 минг евро миқдоридаги товон пулини тиббий хатодан азият чеккан аёлга тўлайди. NRC ахборот хизматининг маълум қилишича, бундай қарор соғлиқни сақлаш муассасалари фаолиятини назорат қилиш хизмати томонидан чиқарилган.

2011 йили тилга олинган аёл гинекология бўйича текширувдан ўтказилган эди. Унинг хабарисиз бачадон саратонига текширув ўтказилган. текширув натижасида аёлда бундай хасталик борлиги аниқланган, лекин бу борадаги маълумотнома аёлга етказилмасдан, архивга йўлланган, натижада аёл тегишли даволаниш курсларидан ўтмаган. Тиббий муассаса ўзининг бу хатосини 2 йилдан кейингина аниқлаган.

Шундан сўнг мижозга ахборот етказилган ва у даволаниш курсидан ўтган, лекин энди кеч бўлган эди. Ҳозир унинг хасталиги даволанмайди, ва, шифокорларнинг тахминича, аёлнинг бир йилдан ошиқроқ умри қолган.