10 йил олдин уйидан қочиб кетган хитойлик қиз 22 ноябрь куни уйига қайтиб келди. Маълум бўлишича, уни қидириш ишлари фойда бермагач, барча уни ўлдига чиқарганди. У эса ота-онасига ўтган вақт давомида интернет-кафеда яшагани ҳақида айтиб берган.

Shanghaiist нашрининг ёзишича, Чжэцзян вилояти, Хэндянь шаҳрида яшаган бу қиз 14 ёшлигида ўз оиласини ташлаб кетган, бунга онаси билан қаттиқ жанжаллашиб қолгани сабаб бўлган. Ота-она уни узоқ вақт давомида қидирган, бироқ натижа бўлмаган.

10 йил ўтибгина, полиция ушбу бедарак йўқолган қизни Ханчжоу шаҳридаги интернет-кафедан топган. У ўз исмини ўзгартирган, интернет кафеда овқатланган, ухлаган, ўйинлар ўйнаш билан банд бўлган. У интернет-кафега ўйнаш учун келган бошқа болалар берган пуллар ҳисобига яшаб келган.

Эндиликда 24 ёшга чиққан бу аёлга ҳужжатларни қалбакилаштирганлик учун 1000 юан жарима тайинланган. Полициячилар унинг ота-онасига қўнғироқ қилиб, фарзандларини олиб кетишни сўраган.

Журналистларга интервью берган она, бошқа ҳеч қачон қизини хафа қилмаслиги ҳақида сўзлаган.