Ўзбекистонда ўтган ҳафтада 183 марта ёнғин қайд этилди. Бу ҳақда Ўзбекистон Ички ишлар вазирлиги Ёнғин хавфсизлиги бош бошқармаси матбуот хизматига асосланиб, «Газета.uz» нашри хабар берган.

Ушбу ёнғинлар оқибатида бир киши тан жароҳати олган, яна бир киши оламдан ўтган.

Ўт ўчириш бўлинмаларининг тезкор саъй-ҳаракатлари эвазига қиймати 482 миллион сўмдан ортиқ бўлган қурилиш маҳсулотлари ва 658 миллион сўмлик товар-моддий бойликлари сақлаб қолинган.

Навоий вилояти Хатирчи туманида, ҳамда Тошкент вилоятининг Пскент туманида электр симларнинг қисқа туташуви натижасида ёнғинлар чиққан. Биринчи ҳодиса натижасида уйнинг 95 кв. метр майдонда томи ва шифт қисми ёниб зарарланган. Иккинчи ҳолатда эса 45 кв. метр майдондаги томга зарар етган.

Фарғона вилояти Қува туманида ҳамда шу вилоятнинг Ўзбекистон туманида иситиш печининг дудбурони қизиб кетиши натижасида ёнғинлар содир бўлган. Биринчи ҳолатда уйнинг 50 кв.м. майдонида томи ва шифт қисми ёниб зарарланган. Иккинчи ҳолатда эса 15 кв.м майдондаги мулк зарарланган.

Эслатиб ўтамиз, 20 ноябрь кунидан 20 декабргача Ўзбекистонда ёнғин хавфсизлиги ойлиги ўтказилмоқда.