Француз полицияси Париждаги Некер шифохонасидан кимёвий моддалардан ҳимояловчи тиббий кийим ўғирлаб кетилиши ҳолатини тергов қилмоқда, деб хабар бермоқда Reuters ахборот агентлиги.

Соғлиқни сақлаш департаменти вакилининг маълум қилишича, 18 ноябрда ҳимоя кийимининг “чекланган миқдордаги” ҳимоя элементлари йўқолиб қолган. Эртаси куни бу ҳақда полицияга хабар берилган.

Ўғирлик сабаблари ҳозирча номаълум, бироқ бу ҳолат 13 ноябрда Париждаги терактлардан кейин кимёвий ва биологик ҳужумлар хавфидан хавотирланиш кучайган бир пайтда содир бўлди. Терактлардан кейин Франция бош вазири Мануэль Вальс парламентдаги нутқи давомида Франция террорчиларга қарши курашда кимёвий ва биологик ҳужумлар хавфига учраши мумкинлигидан огоҳлантирган эди.

Аввалроқ Франция кимёвий қуролга қарши эҳтиёт чораларини кўргани маълум қилинганди.