Қирғизистон пойтахтида Ўш вилоятида содир бўлган зилзиладан жабр кўрган жанубликлар учун инсонпарварлик ёрдамини йиғиш пунктлари очилди. Бу ҳақда ТАСС Бишкек мэрияси хабарига асосланиб хабар қилди.

“Бундай пунктлар тўртта туман маъмурияти биносида очилди. Улар бир ҳафта давомида дам олиш кунларисиз ишлайди, - деди мэрия вакили. – Табиий офатдан зарар кўрганлар ҳозирда қурилиш материаллари, иссиқ буюмлар, озиқ-овқат, мактаб ашёлари ва иссиқ ёпинчиқларга жуда муҳтож”.

Вакилнинг сўзларига кўра, маълум миқдордаги буюмлар тўпланганидан сўнг улар жабрланган ҳудудларга жўнатилади.

Қирғиз томонининг маълум қилишича, айни пайтда юзлаб кишилар қиш арафасида бошпанасиз қолган. Улар иссиқ чодир, печ ва озиқ-овқат маҳсулотларига муҳтожлик сезишмоқда.

Эслатиб ўтамиз, 18 ноябрга ўтар кечаси Қирғизистон жанубидаги Ўш вилоятида 7 баллгача кучли ер силкинишлари қайд этилган эди. Мамлакат ФВВ маълумотларига кўра, зилзилалар натижасида 529та бир қаватли уй яшаш учун яроқсиз ҳолга келган, яна 10таси тўлиқ бузилиб кетган.