Қирғизистоннинг собиқ президенти Қурманбек Бакиевга нисбатан янги айбловлар илгари сурилди. Бу ҳақда мамлакат бош прокуратураси хабар бермоқда.

Айтилишича, собиқ президент ва унинг қариндошлари ҳамда шериклар, булар сирасида собиқ бош вазир Игорь Чудинов, унинг ўринбосари Искандар Айдаралиев ва собиқ қишлоқ хўжалиги вазири Арстанбек Нўғўевлар 2008 йили Бишкек четидаги ер участкаларини бир категориядан бошқасига ўтказиш билан ноқонуний шуғулланиб келган.

“Улар “қишлоқ хўжалиги ерлари” категориясидан “аҳолижойлар ерлари” категориясига ўтказилган”, - дейилади идора тарқатган баёнотда. Шу муносабат билан собиқ президентга коррупция айби қўйилди, Чудинов, Айдаралиев ва Нўғўевлар эса хизмат мансабини суиистеъмол қилишда айбланмоқда.