Буюк Британия қироличаси Елизавета Иккинчининг 90 ёшга чиқиши муносабати билан ўтказилган асосий юбилей тадбирида иштирок этишни истаганлар учун чипталар сотиш бошланди.

Бундай тадбирлар 2016 йилнинг 12-15 май кунлари Виндзор қалъасидаги Ҳоум паркида ўтказилади.

Буюк Британия вақти билан соат 09:00да (Тошкент вақти билан соат 14:00) бошланадиган байрамда бир вақтнинг ўзида 25 минг киши қатнашиши мумкин. Маросим ташкилотчилари чипталар тез вақт ичида сотилиб кетишини тахмин қилишган.

4 кун давом этадиган сайлларда томошабинлар катта театр намойишлари (1500 мусиқачи, раққослар, қўшиқчи ва актёрлар, шунингдек, 900 от иштирокида) гувоҳига айланишлари мумкин.

Байрам тантаналарида дунёнинг турли мамлакатларидан (Канада, Австралия, Уммон, Фижи ва бошқа давлатлар) келадиган кўп сонли ҳарбий оркестрлар ҳамда кавалериялар бўлади. Томошабинлар учун Озарбайжон казакларидан иборат отлиқлар чиқиши ҳам тақдим этилиши режалаштирилган.

Маросимнинг уч кунидаги томошаларни кўриш учун Виндзорлар оиласи ҳам ташриф қилади. Елизавета Иккинчининг ўзи эса тўртинчи кунда халқ олдидан намоён бўлади.
Дастлабки 3 кунги тадбир чипталари нархи 55 фунтдан 165 фунтгача (83 доллардан 250 долларгача). Тўртинчи кундаги маросим учун эса чипта нархлари 75 фунтдан 195 фунтгача баҳоланган (113 доллардан 295 долларгача). Қироличанинг ўзи иштирок этадиган 15 май кунги тадбир якшанба кунига тўғри келади.

Қироллик оиласидагиларнинг маълум қилишича, чипталар сотувидан тушган маблағларнинг барчаси хайрия мақсадида йўналтирилади.

2015 йилнинг 9 сентябрида Қиролича Елизавета II бошқарув давомийлиги бўйича рекорд ўрнатди. У шу куни тахтда 63 йил, етти ой ва икки кун турган ўзининг катта бувиси қиролича Виктория рекордини янгилади.

Қиролича Елизавета II (Queen Elizabeth II) 1926 йилнинг 21 апрелида Лондонда герцог ва герцогиня Йорклар оиласида дунёга келган.

1953 йилнинг 2 июнь куни Лондоннинг Вестминстер аббатлигида Елизаветага тож кийдириш расмий маросими бўлиб ўтган.