Ўзбекистонда хизмат кўрсатган артист, таниқли актёр ва дубляж устаси Ҳошим Арслонов ўзи яқинда “Эзгулик йўли” спектаклида гавдалантирган ҳоким образига бўлган муносабат юзасидан изоҳ билдирди.

Эслатиб ўтамиз, ушбу саҳна асари яқинда қўйилган бўлиб, санъаткорлар уни намойиш этиш учун турли вилоятларга гастроллар уюштиришди. Асарда бош ролни ўйнаган Ҳошим Арслонов ҳоким қиёфасида саҳнага чиқди.

“Шуҳрат Ризаев қаламига мансуб бу асарда кечаги ва бугунги ҳаёт, мустақиллик қадри ўзига хос саҳналарда очиб берилади, - деди у “Оила даврасида” газетасига берган интервьюсида. – Пьеса Фарғона, Бухоро вилоятларида томошабинларга манзур бўлди. Ҳоким ролини менга беришганда, бажонудил рози бўлганман. Чунки бугунги ҳоким образи – замон қаҳрамони”.

Санъаткорнинг таъкидлашича, айрим ҳудудларда томошага келган ҳокимлар унинг ижросида ўзларини таниб, актёрдан хафа бўлиб қолишган.

“Спектакль саҳнага чиққач, тасвирга олинди. Шу тасвирларни кўпайтириб, ҳокимларга жўнатдим. Кўплари “мени қолип қилиб олганмисиз?” деб хафа бўлишди. Хурсанд бўлганим – улар спектаклда ўзини таниди, ўзини кўра билди. “Менинг ҳам мана шундай камчилигим бор. Балки баъзида одамлар билан нотўғри муомала қилаётгандирман”, деган хаёлга келиши меҳнатимизнинг бесамар кетмаганидан дарак беради”, - таъкидлади Ҳошим Арслонов.