CNN Turk телеканали журналисти Эзги Жанкуртаран ўз твиттери орқали Сурия ҳудудига қулаган, Туркия томонидан уриб туширилган Россиянинг Су-24 русумли ҳарбий бомбардимончи самолёти учувчиларидан бири ҳалок бўлгани ҳақида маълум қилди.

Шу вақтда ижтимоий тармоқларда самолёт учувчисининг ерга йиқилиб, ҳалок бўлгани кўрсатилган суратлар тарқалган. Лекин уларнинг ҳақиқийлиги тасдиқланмаган.

Бироз олдинроқ, Россия Мудофаа вазирлиги Су-24 самолёти Латақияда қулагани ҳақидаги маълумотни тасдиқлаган ва унинг учувчилари қидирилиши бошлаганди.

Айни вақтда Россия ҳарбий вертолётлари Сурияда қулаган Су-24 учувчиларини қидирмоқда.

Туркия билан чегара яқинида ҳаракатланган Россия самолёти уриб туширилгани, учувчилар парашют орқали самолётни тарк этган.

Туркия томони самолётни чегарани бузгани учун унга ўқ узишдан олдин 5 дақиқа давомида 10 марта огоҳлантирганини билдирган.

Россия Мудофаа вазирлиги эса бу самолёт бутун парвоз давомида фақат Сурия ҳудудида бўлганини қайд этиб ўтган.

Учувчилардан бири Латақияда яшовчи туркманлар қўлига асир тушгани айтилган. Иккинчисининг тақдири номаълумлигича қолмоқда эди.