Москва суди шаҳардаги биноларга бомба ўрнатилгани ҳақида телефон орқали уч марта ёлғон хабар берган Ўзбекистон фуқаросини ҳибсга олишга кўрсатма берди. Бу ҳақда Пресненский суди матбуот котиби Нина Юркова маълумот берди.

Унинг сўзларига қараганда, 21 ёшли Жамшид Абдирасулов айни пайтда ҳибсда сақланмоқда. У телефон орқали ҳуқуқ-тартибот органларига ёлғон ахборот берганликда гумон қилинмоқда.

16 ноябрь маҳаллий вақт билан 19:30да Арбат тумани бўйича полиция навбатчи қисмига қўнғироқ бўлган. Абдирасулов Карманицкий тор кўчасидаги офис биносида бомба борлигини хабар қилган. Бизнес-марказдан ходимлар ва мижозлар эвакуация қилинган, бино ва унинг атрофи тинтув қилинган. Аммо портловчи ускуна топилмаган.

Ёлғон ахборот берган шахс бир неча кундан сўнг Москва вилоятида қўлга олинган. У 18 ва 19 ноябрь кунлари ҳам бундай телефон террорчилигини амалга оширгани аниқланган.
Воқеа юзасидан жиноий иш қўзғатилган.