Покистон бош вазири Муҳаммад Наваз Шариф Покистон ва Ўзбекистон икки томонлама савдо ҳажмини 300 миллион долларга етказиш учун технологиялар ва тажрибаларини бир-бири билан алмашиши кераклигини маълум қилди.

Review.uz маълумотига кўра, яқиндагина якунига етган икки кунлик ташрифи жараёнида Самарқандда бўлган Муҳаммад Наваз Шариф оғир техникалар, жумладан, юк машиналари, пахта ва шоли йиғиш комбайнлари, сеялкалар, тракторлар ва автобуслар ишлаб чиқарилиши жараёни билан танишди.

Унинг ўзбекистонлик ҳамкасби Шавкат Мирзиёев ўзбек комбайнлари дунё бозорида сотилаётган бошқа шу каби техникалардан анча арзон эканини таъкидлаб ўтди. Ўзбекистон бош вазирининг сўзларига кўра, Покистонга аграр мамлакат сифатида бундай техникалар зарур ва ўзбек тажрибасидан фойда олиши лозим.

Покистон бош вазирига пахта ҳосилининг учинчи ва тўртинчи йиғимларида ҳам иштирок этиб, фақатгина етилган ҳосилни териб оладиган, хом ашё тайёргарлигини табақалаштирадиган комбайнлар кўрсатилди. Шавкат Мирзиёев Ўзбекистон ташқи иқтисодий алоқалар, инвестиция ва савдо вазири Покистонга ташриф буюриб, Покистон заминида ўзбек қурилмаларини синовдан ўтказиши мумкинлигини маълум қилди.