Қозоғистоннинг Қарағанда шаҳрида жойлашган модель агентлиги директори устидан ўтказилган суд жараёни якунига етди, деб хабар беради Nur.kz сайти.

Аниқланишича, 24 ёшли Алия Нуркенова кўплаб қизларни чет элга фоҳишаликка юбориб келган. Ҳар ҳафта Баҳрайн ва БААга 7-10 нафардан қиз юборилган. Директорнинг ўзи ҳам модель бўлиб, Қозоғистон ҳамда қўшни давлатлардаги кастингларда бир неча маротаба иштирок этган.

Бугун, 24 ноябрь куни, Қарағанда вилоят суди аппеляцион коллегияси Нуркенованинг уни гаровга қўйиб юбориш борасидаги даъвосини кўриб чиқиб, уни қондирмасликка ва қизни тергов изоляторида қолдиришга қарор қилди.

Тергов иши Баҳрайн қироллиги элчихонаси назорати остида бормоқда – у ерга жабрдийда қизлардан бири мурожаат қилган эди. Элчихона дарҳол Қозоғистон ИИВ билан боғланиб, жиноятчини фош қилишга ёрдам берди.
Нуркенова айбини тан олмай, қизлар ўз ихтиёрлари билан кетганлигини таъкидламоқда.