Пойтахтимизда “ЕвроОсиё – 2015” иккинчи халқаро паррандачилик форуми бўлиб ўтди. Бу ҳақда Ўзбекистон Миллий ахборот агентлиги хабар қилди.

Хабарда келтирилишича, форумда Ўзбекистон Савдо-саноат палатаси, Ўзбекистон менежерлар ва “Паррандасаноат” уюшмалари ҳамкорлигида ташкил этилган тадбирда Ўзбекистон, Хитой, Голландия, Россия, Украина каби давлатлар вакиллари иштирок этди.

Ўзбекистон Савдо-саноат палатаси раиси А.Шайхов, “Паррандасаноат” уюшмаси раисининг ўринбосари П.Раҳматуллаев, Евроосиё паррандачилар уюшмаси президенти С.Шабаев ва бошқалар Ўзбекистонда Президент Ислом Каримов раҳнамолигида қишлоқ хўжалигини модернизация қилиш ва фермерлик ҳаракатини ривожлантириш борасида амалга оширилаётган ислоҳотлар озиқ-овқат маҳсулотлари мўл-кўллиги ва аҳоли фаровонлигини таъминлашда муҳим омил бўлаётганини таъкидлади.

Жорий йилнинг тўққиз ойида Ўзбекистонда қишлоқ хўжалиги маҳсулотлари етиштириш 6,6 фоизга ўсди. Паррандачиликка ихтисослашган уч мингдан ортиқ тадбиркорлик субъектлари ва фермер хўжаликларида парҳез гўшт ва тухум етиштириш ҳажми йил сайин ортмоқда. Ҳозир юртимизда қарийб 55 миллион парранда парваришланмоқда. Бу ўтган йилнинг шу даврига нисбатан 7,6 фоиз кўпдир.

Халқаро форумда соҳада қисқа муддатда парранда маҳсулотлари етиштириш ҳажмини ошириш ва аҳолини сифатли парҳез маҳсулотлари билан таъминлашга эришилгани алоҳида қайд этилди. Шунингдек, паррандани озиқлантириш, касалликларга қарши курашиш, наслчилик ишларини яхшилаш, соҳага замонавий технологияларни кенг жалб этишга бағишланган маърузалар тингланди.