Олмалиқ тоғ-металлургия комбинати ва Туркиянинг “Dal Teknik Makina” компанияси ўртасида Ўзбекистонда яна бир янги цемент заводи қуриш бўйича меморандум имзоланди. Бу ҳақда компания вакили Лина Дюрак Тошкентда очилган "BusinessCem 2015" халқаро конференция давомида маълум қилди.

Дюракнинг таъкидлашича, ушбу лойиҳа ҳам Сурхондарё вилоятида амалга оширилиб, 2018 йилнинг июль ойида тугалланиши режалаштирилмоқда.

Янги завод йилига 1,5 миллион тоннагача цемент ишлаб чиқариш қувватига эга бўлиши режалаштирилган.

Мазкур лойиҳанинг умумий қиймати 250 миллион АҚШ долларига яқин маблағни ташкил қилади. Ушбу маблағ Олмалиқ тоғ-металлургия комбинати, Ўзбекистон Республикаси тикланиш ва тараққиёт жамғармаси ҳамда маҳаллий тижорат банкларининг кредитлари ҳисобига молиялаштирилади.

Маълумот учун, айни пайтда Ўзбекистонда 8та цемент заводи фаолият юритади ва уларнинг умумий ишлаб чиқариш қуввати 8,64 миллион тоннани ташкил этади.