Россия ва Эронни бирлаштириб турган умумий манфаатлар нефть экспорти, ядровий дастур ҳамда президент Башар Асадни сақлаб қолиш билан боғлиқдир. Лекин, USA Today колумнистининг фикрича, ҳар учала масалада улар ҳамкор эмас, кўпроқ, рақобатчига ўхшаб ҳаракат қилмоқда.

Душанба куни Эронга ташрифи чоғида Россия президенти Владимир Путин икки давлат кўплаб умумий мақсадларга эга эканлигини таъкидлади. Шу билан бирга, таҳлилчиларнинг фикрича, бу иттифоқ нима билан якунланиши номаълум.
“Гап нефть ҳақида кетганда, улар рақобатчи. Ҳар иккаласи ҳам Асадни ҳимоя қилаётгани уларнинг бу борадаги мақсадлари дегани эмас”, - дейилади материалда.

Россия Эронга ядровий ёқилғи ва технологияларни сотмоқчи, аммо россиялик ишлаб чиқарувчиларнинг секин ҳаракат қилаётгани Теҳронни Европадан қўшимча ҳамкорлар қидиришга мажбур қилмоқда. Эрон, шунингдек, ўзининг газ ва нефть конларини ривожлантириб, қазиб олишни кунига 1 млн баррелга етказмоқчи. Бу эса нефть нархининг тушишига олиб келади ва яна Россиянинг манфаатларига зид келади.
Сурияда ҳам икки давлат ўртасида зиддият бор.

“Россия ва Эрон Асадни ҳокимият тепасида қолдиришга ҳаракат қилмоқда, аммо уларнинг сабаблари ҳар хил. Эрон Асадни “Ҳизбуллоҳ” жангариларини қўллаб-қувватлашда уларга ёрдам беришини кутмоқда”, - деди АҚШ Атлантик кенгаши вакили Фред Хоф.
Эрон учун “Ҳизбуллоҳ” Исроилга таъсир кўрсатишнинг энг муҳим воситаларидан биридир. Россия эса, ўз навбатида, бу ташкилот билан ҳамкорлик қилмайди, Путиннинг асосий мақсади – АҚШнинг демократизация лойиҳасига халақит бериш.

Шу тариқа, Эрон, “Ҳизбуллоҳ”дан ташқари, Афғонистон ва Ироқдаги кўнгиллиларга кўмак беришда давом этмоқда, Россия эса Сурия армиясини қўллаб-қувватламоқда. Бу Москва ва Теҳрон иттифоқининг охири борлигидан далолат беради, деб хулоса қилади мақола муаллифи.

Элдор Асанов тайёрлади