Хитой Эронга борадиган янги тезюрар темир йўлини қурмоқчи. China Daily нашрининг ёзишича, бу йўл Марказий Осиёнинг 4 давлати, шу жумладан, Ўзбекистоннинг ҳам ҳудудидан ўтади.

Лойиҳа ҳақида China Railway Corp бош муҳандиси Хе Хову томонидан “Бир камар – бир йўл” форуми чоғида маълум қилинди. Унинг сўзларига қараганда, бу йўл йиллик товар айланмасини 2.5 трлн долларга етказади.

Янги темир йўл Шинжон пойтахти Урумчини Хитойнинг Инин, Қозоғистоннинг Олмаота, Қирғизистоннинг Бишкек, Ўзбекистоннинг Тошкент ва Самарқанд, Туркманистоннинг Ашхобод ва Эроннинг Теҳрон шаҳарлари билан боғлайди.

Таъкидланишича, бундай темир йўлни яратиш зарурати турли давлатлардаги темир йўл стандартлари билан боғлиқ муаммоларни ҳал қилиш билан боғлиқ равишда келиб чиққан.