Россия Туркия томонидан ўзининг Су-24 самолёти уриб туширилишига кескин шарҳлар берганига қарамай, улар ўртасида кенг миқёсли уруш келиб чиқиши эҳтимолдан узоқ, деб ҳисоблайди Forbes журнали.

Айтилишича, Суриядаги ҳарбий кампания Россия учун шу қадар яхши кетаётган эдики, бомбалаш суръатлари Ғарб давлатлари коалициясиникиданам ошиб тушди. Аммо Туркия Россия самолётларидан бирини уриб тушириши билан вазият ўзгарди.
Мақолада таъкидланишича, бу Корейс урушидан буён НАТО кучлари биринчи марта Россия самолётини уриб тушириши бўлди.

Нью-Йорк университети профессори, Россия хавфсизлиги бўйича эксперт Марк Галеоттининг фикрича, иккала томон кўп айбловларни айтаётганига қарамай, бундан ортиғига ҳеч бири журъат эта олмайди.
Айтайлик, Москва Анқарага қарши ҳарбий ҳаракатларни бошлайман деса, унга шунчаки ресурс етишмайди.

Россия армияси Суриянинг ўзидаёқ жиддий синовларга дучор бўлмоқда, бир пайтнинг ўзида икки давлат билан урушиш эса мамлакат иқтисодиёти учун оғирлик қилади.
Галеоттининг айтишича, яқин кунларда бўлиши мумкин бўлган энг ёмон сценарий Путиннинг кескин руҳдаги нутқларидир.