Франция бош вазири Мануэль Вальснинг маълум қилишича, Европа Иттифоқи бундан кейин Яқин Шарқдан қочқинларни қабул қилишни тўхтатиши ва чегараларни кучайтириши керак.

"Бу билан мен Германия сиёсатини танқид қилмоқчи эмасман. Германия ўз танловини амалга оширди ва бу билан барча масъулиятни ўз зиммасига олди", дея қайд этган Вальс журналистлар билан учрашуви вақтида.

Унинг сўзларига кўра, айниқса Франция ва Бельгия ўз чегараларини мустаҳкамлаши керак.

Вазирнинг қайд этишича, Франция 2015-2016 йилларда ўз ҳудудига қабул қилиши белгиланган 30 минг қочқинни кутиб олиш бўйича мажбуриятини бажаради.

"Лекин французлар Париж теракти ижрочилари орасида қочқин сифатида юртимизга келганлар бўлганини билишади. Бу эса бутун Европа чегараларида назорат кучайтирилиши кераклигини англатади", дейди у.

Бироз олдинроқ, Македония ва Греция ҳудудида тўхтатилган қочқинлар бунга қарши норозилик сифатида ўз оғизларини тикиш акциясини ўтказишаётгани маълум бўлганди.

13 ноябрь куни Парижда содир этилган терактлардан кейин ЕИнинг кўплаб давлатлари чегаралари назоратини кучайтиришга киришган.