24 ноябрь куни кечаси, Франция шимолидаги Лилль шаҳридан узоқ бўлмаган Рубе шаҳарчасида (Бельгия билан чегарадан 2 км ичкарида) номаълум шахслар одамларни гаровга олди.

Linternaute нашрида маълум қилинишича, 2 нафар талончи банк директори ва унинг оила аъзоларини гаровга олган.

Гувоҳларнинг сўзларига кўра, полиция шубҳали шахсларни текширмоқчи бўлганида улар автоматдан ўт очган.

Аввалига бу ҳодиса террорчилик билан боғлиқ бўлиши мумкинлиги тахмин қилинган ва ҳудудга махсус кучлар етиб келган. Шаҳарга префект, мэр, прокурор ҳам етиб келган ва аҳоли яшайдиган уйлар қўриқланиши кучайтирилган.

Тез орада қутқарув амалиёти ўтказилган ва гаровдагилар озод этилган. Бу ҳақда Лилль шаҳри прокурори Фредерик Февр маълум қилган.

Полиция маълумотига кўра, қутқарув операцияси давомида жиноятчилардан бири ўлдирилган. Гаровдагилар айни вақтда хавфсиз жойда ва уларга керакли тиббий ёрдамлар кўрсатилмоқда.