GM Powertrain Uzbekistan қўшма корхонаси енгил автомобиллар учун йилига 225 минг дона двигатель ишлаб чиқаради.
Мазкур маълумот АҚШнинг Тошкентдаги элчихонаси томонидан ташкил этилган матбуот анжуманида корхонанинг бош директори Женнифер Бигелоу томонидан эълон қилинди.
Унинг хабар беришича, 2011 йилдан буён Ўзбекистонда муваффақиятли фаолият кўрсатиб келаётган корхонада ишчи ҳажми 1,2 ва 1,5 литрни ташкил этувчи иккинчи авлод B-DOHC двигателлари ишлаб чиқарилмоқда.
Қўшма корхона устав фондининг 48 фоизи “Ўзавтосаноат” АК ҳиссасига тўғри келса, “General Motors” – 52 фоизга эгалик қилади.
“GM Powertrain Uzbekistan” Андижон вилоятида Асака шаҳридаги асосий автойиғувчи конвейерга “Chevrolet Spark”, “Chevrolet Cobalt”, “Chevrolet Lacetti” (“Chevrolet Gentra”) каби автомобиль маркалари учун двигателлар етказиб бермоқда, деб ёзади Review нашри.
Ўзбекистонда ишлаб чиқарилаётган 5 фоиз қувват агрегатлари АҚШга экспорт қилинмоқда, дея қайд этди Женнифер Бигелоу.