Париждаги терактлар ташкилотчси Абдулҳамид Абауд 13 ноябрь воқеаларидан кейин яна бир катта теракт тайёрлаган. Guardian нашри маълумотига кўра, у қолган тарафдорлари билан Ла-Дефанс туманида теракт уюштирмоқчи эди.

24 ноябрь куни Париж шаҳри прокурори Франсуа Молен журналистларга 18 ва 19 ноябрь кунларида террорчилар Ла-Дефанс мавзесида терактлар содир этмоқчи бўлгани ҳақида маълумот берган. Унинг аниқлик киритишича, Париждаги терактлар вақтида Абауд бир неча соат давомида ҳужум уюштирилган кафелардан бири яқинида воқеаларни кузатган.
18 ноябрь куни Париж шимолидаги Сен-Дени тумани ҳудудида ўтказилган аксилтеррор амалиёт вақтида у ўлдирилган.

Айни вақтда Париж терактига алоқадор шахсларни излаш ва қўлга олиш ишлари давом этмоқда. Париж прокуратураси террорчилардан 2 нафарига терактдан олдин уйидан жой берган шахсга айблов эълон қилди.

Прокурор Моленнинг айтишича, Жавод Бен Дау исмли ушбу шахс теракт содир этилиши режасидан бехабар бўлган бўлиши мумкин, лекин у гувоҳ сифатида қўлга олинган.

Шунингдек, унинг қўшнилари Бен Дауни "маҳалла гангстери" сифатида билишган.

Бироз олдинроқ, Париж терактига алоқадорликда гумон қилинган 124 киши қўлга олинган.

Эслатиб ўтамиз, 13 ноябрь куни Парижда давомли терактлар содир этилган. Натижада 130 киши ҳалок бўлган, 351 киши жароҳатланган, уларнинг 99 нафари оғир аҳволда қолмоқда.